[寵物資訊] 【強國禁大狗】狗狗愛聞地、打交點算好？訓練師醒你小貼士

本帖最後由 itsctsu 於 2019-12-30 09:33 AM 編輯

Decky Sir教路訓練狗狗小窺門，還特別帶來6歲大的拉布拉多尋回犬「細佬」作示範。

養狗必須負責任，而作為一名負責的狗主，必須了解自己狗狗的品性，並加以訓練。犬隻訓練師Decky Sir說：「其實隻狗可唔可以教，好在於狗主嘅諗法，因為思維影響行為。」狗主要有原則性、有耐性地教，「槪念好緊要，香港大多數狗主係想學一個方法去控制隻狗，唔係想教識隻狗」。

Decky Sir提供了不少教狗小貼士，還特別帶來6歲大的拉布拉多尋回犬「細佬」作示範。已追隨Decky Sir五年的「細佬」，不僅學識salute（敬禮）、企瑜伽波練身體，還習得不少技能，包括掉波入櫃桶再閂櫃桶，甚至效法宇宙最強甄子丹，「踢」飛水樽蓋！

戴口罩
一般人都直接將口罩戴上，這樣會令狗亂抓。Decky Sir現場示範，向「細佬」發出簡短指令：「Mask！」「細佬」便乖乖將嘴巴伸進口罩，「佢留喺度之後，就大把機會幫佢綁上，隻狗就唔會搲。」

拖狗帶放狗
Decky Sir說，一般人拖帶會直接握着帶頭的圈圈，走路時任由狗狗四圍走和聞地，發現陌生人時就易去撲。狗主應先收短狗帶，讓狗靠近你，易於控制。走路時狗跟在狗主身側，隨狗主步速快而快、慢而慢，這樣才叫「行街」。直至狗主能控制狗，才改握拖帶頭的圈圈。

他特別提到，好多狗主以為收短狗帶，就是要短到勒住狗狗，「但唔係咁嘅，你要畀隻狗知道，呢個係訊號，狗帶鬆時係yes，狗帶緊時係no，唔使要好大力，佢識跟條帶。人係利用狗帶hold住隻狗，唔係control住隻狗。」

唔想狗聞地
當發現狗狗聞地，狗主可以「chok」狗帶，同牠說「no」，「chok」得多，牠就不會聞，但這不是最好方法，因為牠沒有動力在狗主身上，牠的動力始終都係地上。要吸引狗狗注意力，狗主可拿着食物走，或呼喚牠的名字，跟牠說話。訓練得當的話，就算食物跌落地，牠也不會主動吃。

陌生人摸自家狗
有些狗不喜歡被人摸，隨時會「咬一咬」保衞自己。如果自家狗狗是這種品性，狗主便須多加留意，見有喜歡狗的陌生人上前伸手欲摸，就要出聲制止：「唔好，咬人嘅！」而大家亦應尊重狗狗的感受。

Decky Sir提醒，不要摸初次見面的狗，因為你突如其來的動作，可能會嚇到牠，牠就會用口阻擋以自衞。至於坊間有傳，可先伸手背讓狗聞，「其實係錯，如果係咬人嘅狗，一早咬咗你，唔關手背定手掌事，調番轉，如果係唔咬人嘅，你畀個拳頭佢，質搥佢都唔咬你，因為佢個意識唔係咁」。他建議應先詢問狗主是否能摸，或「見多幾次，隻狗埋嚟approach你、聞你，你垂低隻手由佢聞，佢聞緊時，你搲下佢，咁咪已經觸摸緊，然後慢慢你先去摸」。

兩狗互動
狗同狗玩時，狗主要設定「臨界點」。因為狗A和狗B是好朋友，玩得很粗魯，但到其中一方作勢要咬時，就會停止遊戲；當狗A跟狗C玩時，狗C又可能會覺得粗魯就是打架，兩狗就會打起來。狗主平時不落brake，打交時更無法喊停。而狗主可透過訓練，任意設定「臨界點」，如狗有「woo聲」就停或不准撲對方等。

當兩狗打架時，狗主應制止自己的狗，因為牠多數不會咬主人，就算怒火高漲也不會咬得太傷。若狗主控制對方的狗，就可能因與牠不熟而受襲擊，而狗主的行為，亦會讓狗狗以為主人正攻擊對方，繼而撲咬牠。

遇到怕狗的人
狗主知道對方怕狗，應將狗拉過一些。Decky Sir提醒，怕狗的人應直接繞過去，避免有縮肩彈開的動作，因為這樣做「其實就係撩緊隻狗」。
《蘋果》記者