標題: 青心直說：金融小子似清兵 [打印本頁]

---

作者: vwgolfgti    時間: 2013-3-21 07:28 AM     標題: 青心直說：金融小子似清兵

前日午後風雲色變之際，傳媒好友急急來電，話證監會向老外券商發出限制通知書，聽講話涉及約100名客戶，意圖問個究竟。查實連自己對事件都係朦查查，SFC唔解釋落閘封舖原因，又三緘其口，見佢神神秘秘，惟有斷估。
市場中人不約而同估計，離不開衰喺無貨沽空，無論係坐盤抑或客戶柯打，在香港都係犯法。近年市場中呢類出身自外資大行嘅衰仔樂園，開得多如牛毛，學咗幾年師，識咗幾個老細，就話出嚟搞甚麼對沖基金、私募基金，甚至只係攞個牌開個竇炒出炒入。
叫甚麼名字其實沒所謂，關鍵在於，一群連股災都未見過的小子，渾身是膽，不僅上下其手，而且無法無天，近年不少古怪小型基金，更與金融界疊馬仔朋比為奸搵真銀，向小型上市公司搭訕，看對方願不願意配一點股票或CB出來，實行街外錢齊齊搵，最終賺大錢者，仍然是金融界疊馬仔，至於上市公司，通常就係最終輸家，連股票都隨時下落不明，有時連懵仔基金，都要輸住走，所輸者，當然又係OPM（Other People's Money），基金佬就管理費與表現費（如果有的話）袋袋平安。




衰仔樂園屬冰山一角未做過後勤，又焉知何謂內部監控，甚至連風險意識都欠奉。不少私募也是找外資大行助其完成每天的mark to market，對沖基金透過槓桿錢搵錢又越來越困難，掛個水牌開個竇自己炒，就名正言順不怕被炒兼自由自在，只是，求財亦切忌太狼死，誰不知道連借貨都慳番，慳多1蚊就等於賺多1蚊！
若真的如市場中人所料，有人要鋌而走險，被形容為計時炸彈，也不無道理。即使整件事未有直接牽涉太多廣大市民利益，亦難免影響市場信心，然則，市場充斥入世未深金融小子的今天，同類事件會否只屬冰山一角？難道昨天補倉補到氣咳，又要歸功於此？

---

歡迎光臨 公仔箱論壇 (http://www.tvboxnow.com/)

Powered by Discuz! 7.0.0