今晨舉行嘅B組大戰，奪標熱門西班牙面對已篤定出局嘅摩洛哥，全場飽食驚風散，喺兩度落後，僅靠後備登場嘅伊亞高艾斯巴斯補時建功，仲要有VAR幫手證實合法，先可以2比2逼和摩洛哥，搶番1分。賽後「鬥牛兵團」以3戰得5分及較佳得失球，力壓打和伊朗嘅葡萄牙取得首名出線。
上半場以西班牙形勢較為佔優，控球比率達7成，然而已經出局嘅摩洛哥，踢落表現令人喜出望外，球員都頗具鬥志。摩洛哥更喺開賽14分鐘趁住西班牙中場恩尼斯達同沙治奧拉莫斯誤會出錯，由前鋒保達比偷得皮球，由中場線帶入禁區單刀射入，取得領先。不過「鬥牛國」4分鐘後用一次美妙組織，由恩尼斯達左路底線傳中，由艾斯高近門接應抽入，追和1比1。之後摩洛哥再有一次領先機會，無奈保達比又一次單刀未能把握，雙方半場打和1比1。
換邊後西班牙繼續圍攻摩洛哥，但入唔到波之餘，更喺81分鐘畀摩洛哥前鋒安尼斯利接應角球頂入，以1比2再度落後。好彩係，「鬥牛兵團」末段狂攻，去到補時1分鐘終由後備兵伊亞高艾斯巴斯射入追和2比2完場。值得一提，呢位切爾達前鋒嘅入波本來被判越位，但多得VAR幫手，球證改判入波，西班牙先可以拎番呢寶貴1分，取得小組首名出線，16強會鬥A組次名俄羅斯。 |
發表於 2018-6-26 05:56 AM
| 