Honda Jazz 1.3 LX 　平民愛爵士

金融海嘯下，汽車業所受的打擊唔細，好多車行都改以觀望態度，唔敢貿貿然入貨，免得變蟹貨，但凡事總有例外，好似 Honda 就逆市推出首批全新 Jazz 1.3EX 版，唔使兩個星期，已經去 300 部車，今日 Honda 再接再厲，引入平版 LX 型號，平凡中見性格，係新一代平民爵士

直版 LX 玩味減

■ 一如 Jazz 素來風格， LX 版內櫳空間依然充足，只係無咁多皮飾。

代理早排引入全新一代 Jazz 1.3EX 豪版型號，逆市大賣；經濟持續低迷，代理就引入直版 Jazz 1.3LX 型號，畀車迷多一個經濟選擇。新 Jazz 最大賣點絕對係佢個巨型天幕天窗，無論係直版 LX 型號抑或係豪版 EX 型號都保留呢個裝配，車身同樣搭配 1.3 公升 i-VTEC 環保引擎連五前速波箱，副偈一樣，之不過叫得做直版，即係無咁多豪華配備，外形上最為明顯，好似全車大包圍及車尾擾流器、鬼面罩鍍鋁邊飾、霧燈及 LED 燈尾燈，就連輪胎都由 16 吋換作 15 吋。

內裝方面最顯著改動係中控及方向盤，手枕、真皮環連音響控制系統等等，尤其係省卻環加減撥片，操控玩味大減，當日上斜坡時更被 EX 版推住行！但，話晒新一代 Jazz 無論車長及軸距都較上一代長，重量又增加少少，配以 i-VTEC 偈，未到 2,000 轉已經好夠力水，就算以 D 波加速，反應亦算直接，谷到轉數上到頂差不多達 6,000 轉都唔算辛苦，真係唔似單 Cam 風格，相輔相成，入彎表現穩定，操控性唔錯。

■ 全新 LX 直版中控環設備簡化。

■ 兩款車都係三圓鍍邊飾儀錶板。

■ LX 版保留新 Jazz 巨型天幕天窗特色。

■ LX 版本並無加減波配備，一字排波檔，簡單易記。

尾燈亦由 LED 換作一般燈泡，平但就無咁耐用。

■ 15 吋輪胎細，無咁型但就慳油。

車價約平萬五、六
LX 版本外形上無 EX 版般 Sporty ，反而多添一份簡約清純，輪胎細相對地慳番唔少油，加上 Jazz 自推出以來，素以實用慳油見稱， LX 版本咪就係慳上慳，一字排檔操控簡單易記，日常代步絕無難度，只係好玩度及操控性當然無 EX 版本五前速波箱連環加減撥片來得盡興，想幾時拖波就幾時，想要就有，唔似得自動波般等佢自動調節，話番轉頭，家十居其九私家車車主都係一波走天涯，直版係就係無咁 Body Kit 及豪華配備等，但引擎容積相當，無損 Jazz 素來討人歡喜實用慳油功能及形象。

LX 同 EX 版本由於裝備有所不同，價錢當然有分別喇，以上一代為例， EX 版本比 LX 版本約貴萬四蚊左右，新一代 Jazz 由於日圓高企，車價亦較之略為貴一些，全新 Jazz 1.3EX 現時售價為 $149,880 ，估計 LX 版售價都係平萬四蚊左右，即十三萬五、六千左右吧！

好多人都話有 Body Kit 大包圍 EX 版靚仔又好睇，之不過，呢個世界有所謂各花入各眼，最緊要係自己鍾唔鍾意，經濟負唔負擔得來。