[新聞] 安帥換副手搵馬甸尼上車

HIDE

13/11/2010

車路士請韋健士食無情雞，馬甸尼、蘇拿接替上「車」？車路士於當地時間周四宣布炒掉助教韋健士，據悉領隊安察洛堤並冇刻意挽留，事關佢一早已經打算搵同胞馬甸尼或蘇拿接替其空缺，實行同聲同氣全面意國化。

「冗員」韋健士不獲續約

韋健士今次離隊可謂事出突然，因為韋健士係喺周四一場預備組比賽嘅半場休息時間，接到高層電話被通知不獲續約，結果下半場都冇睇即場離開球場，該場比賽安察洛堤亦有份觀戰。據韋健士身邊人透露，韋健士從來冇諗過球會唔同佢續約，所以感到好失望，有傳韋健士目前年薪高達三十五萬鎊，但真正工作卻不多，故此令車仔決心炒人。

安察洛堤雖然早前曾經公開大讚韋健士，不過在今次事件當中，安帥卻未有花太多唇舌去要求球會留人，因為安帥早已打算更換助教班底，頭號目標係曾經喺AC米蘭共事嘅前意大利國腳馬甸尼，但一切仍有待馬甸尼答覆。如果斟介失敗，矛頭將會指向曾經効力車仔嘅另一名前意大利國腳蘇拿。