[賽後精華] 紐約人反底滅「火」

nt1972

周三舉行嘅常規賽，紐約人憑住較高嘅命中率，以98:90擊敗熱火，終止對熱火八連敗嘅頹勢；雖然今季常規賽進行咗未夠一半，但係紐約人拎到嘅勝仗已經多過上季。

熱火今場命中率只得45.1%，三分波仲要17射得兩中，命中率只得11.8%；反觀紐約人命中率有55.7%，佢哋憑較出色嘅表現贏波，對熱火八連敗嘅頹勢告終。正選上陣嘅紐約人球星安東尼（Carmelo Anthony）今場12投九中，拎到25分，命中率高達75%；呢位贏波功臣就話：「如果我哋可以保持近三場比賽嘅水準，紐約人對任何一隊球隊都可以贏。」雖然紐約人上季係東岸史上戰績最差嘅球隊，全季82場常規賽只係贏得17場；但佢哋今季經過37場常規賽之後，已經贏到18場，進步咗好多。

上一場因傷缺陣嘅熱火中鋒「白邊哥」韋西迪（Hassan Whiteside），今場正選上陣只拎到八分，佢話右膝傷勢影響咗佢嘅表現；而佢賽後投訴球證漏判紐約人新秀普辛基斯（Kristaps Porzingis）犯規：「我喺第四節入樽嗰陣俾佢一巴冚落嚟，搞到成塊面冇晒感覺。」